АБДУЛАЕВ Леча

           *** 
Луо догIу. КIайн  луо ду дуьллуш.
ХIан-хIа, ца деа и – цIиэн луо.
БIешераш бIешершка дуьйлуш,
Дуьне кхин хийца ца дели.
 
БIешераш хьалха а санна,
БIешераш тIаьхьа а изза
Бакъ боху буоберан саллар
Ден цIа схьакароза хьийза.
 
Кор тоьхча, чиркхаш чуузу.
НеI тоьхча, зайлаш дIадухку.
Да вац и чудита, дузо,
И дижо, корта ца бухкуш…
 
Луо догIу, кIайн луо. Догдилла:
Дуьненах дог лозург вело,
Дуьненна бакъ оьшуш хилла,
ДогIур дац цкъа а и цIиэн луо…